दोस्रो चरणको कोरोना भाइरसको संक्रमणका कारण सुदूरपश्चिम प्रदेशमा जेठको पहिलो साता १०१ जनाको मृत्यु भएको छ । सुदूरपश्चिम स्वास्थ्य निर्देशनालयको तथ्यांक अनुसार जेठ १ गतेदेखि ७ गतेसम्म एक सय १ जनाको संक्रमितले ज्यान गुमाएका हुन् ।
एक साताको अवधिमा सबैभन्दा वढी जेठ २ गते २१ जनाको मृत्यु भएको छ । जेठ १ गते १६ जना, जेठ ३ र ४ गते १४÷१४ जना, जेठ ५ गते १५ जना, जेठ ६ गते १० जना र जेठ ७ गते ११ जनाको मृत्यु भएको सुदुरपश्चिम स्वास्थ्य निर्देशनालयको तथ्यांकमा उल्लेख गरिएको छ ।
७ दिनको अवधिमा प्रदेशभर पाँच हजार ३६ जनामा कोरोना संक्रमण पुष्टि भएको छ । निर्देशनालयका अनुसार जेठ ७ गते सबैभन्दा वढी ९ सय ३४ जनामा कोरोना संक्रमण पुष्टि भएको छ । तथ्यांक अनुसार जेठ १ गते ४८२ जना, जेठ २ गते ८७६ जना, जेठ ३ गते ४८७ जना, जेठ ४ गते ५८३ जना, जेठ ५ गते ८८१ जना र जेठ ६ गते ७९३ जनामा कोरोना संक्रमण पुष्टि भएको छ ।
यो अवधिमा दुई हजार दुई सय ५८ जनाले कोरोना जितेका छन् । सबैभन्दा बढी जेठ ७ गते ५९७ जना कोरोनालाई हराएर घर फर्किएका छन् । तथ्यांक अनुसार जेठ १ गते १४९ जना, जेठ २ गते २१७ जना, जेठ ३ गते ३२९ जना, जेठ ४ गते २३४ जना जेठ ५ गते ३९८ जना र जेठ ६ गते ३३५ जनाले कोरोनालाई परास्त गरेका छन् ।
