सोमबार कञ्चनपुरको नेपाल भारत सीमा क्षेत्रमा गोली लागेर घाईते भएका दोधारा चाँदनी नगरपालिका –१, बलयलबन्द स्याउले टोलका १६ वर्षीय नरेश सुनारको अहिले महाकाली अस्पतालमा उपचार भईरहेको छ । बजारबाट सामान किनेर फर्कदै गरेको अवस्थामा आफू माथि गोली प्रहार भएको घाईते सुनार बताउँछन् । तर, प्रहरीले भने रुख काटिरहेको अवस्थामा उनी माथि आक्रमण भएको जनाएको छ ।
रुख काटिरहेको बेला उनीहरू माथि आक्रमण भएको र सुनारलाई छर्रा लागेको जिल्ला प्रहरी कार्यालय कञ्चनपुरका प्रवक्ता प्रहरी नायव उपरीक्षक अमर बहादुर थापाले बताए । ‘घटना स्थलमा एउटा रुख काट्दै गरेको पनि देखिएको छ । फलामको आरा पनि त्यही छ ।’ उनले भने ‘त्यो बेला यिनीहरू काठ चोरी गर्न गएको पाईएको छ ।’
भारतीय वन रक्षकले उनी माथि गोली प्रहार गरेको हुन सक्ने अनुमान प्रहरीको छ । काठ तस्करीमा घाईते सुनार बाहेक अन्य दुई जना पनिसँगै रहेको प्रहरीले जनाएको छ । मङ्गलवार बिहान सम्पर्कमा आएका सोही ठाउँमा बब्लु चन्दको बयानका आधारमा पनि उनीहरू रुख फडानी गर्न गएको बुझिएको प्रहरी नायव उपरीक्षक थापाले बताए ।
मंगलवार बिहान घटनास्थलको अनुगमनमा गएको टोलीले पनि वन फडानी भईरहेको जनाएको छ । ‘यहाँ धेरै रुख काटिएका छन’ दोधारा चाँदनी नगरपालिका मेयर वीरबहादुर सुनारले भने ‘हामी यहाँ पुगेर हेर्दा बन फडानी रोक्दा उनी घाईते भएको देखिन्छ ।’
