कैलालीको बुढीतोलाको एक होटलमा युवतीसँग समातिएका ईलाका प्रहरी कार्यालय मालाखेतीका डीएसपी भरतराज चौधरीको घटना छानबिनको काम सरु भएको छ । घटनाको छानविन गर्नका लागि गठन गरिएको समितिले काम सुरु गरेको हो । छानविनका लागि प्रहरी उपरीक्षक (एसपी) दिलिप सिंह देउवाको नेतृत्वमा चार सदस्यीय समिति बनाईएको थियो ।
चौधरीको ईञ्चार्जको जिम्मेवारी पनि खोसिएको छ । हाल जिल्ला प्रहरी कार्यालय कैलालीमा तानिएका उनले भने आफू सूचना संकलनका लागि त्यस क्षेत्रमा गएको र नेटवर्क नआउने ठाउँमा भएकाले गलत बुझिएको बताएका छन् । तर घटना के हो भन्ने विषयमा थप अनुसन्धान गर्न प्रहरी अधिकृतले छानविनको काम थालेका हुन् ।
उनको दाबीमा सत्यता छ छैन ? उनी किन त्यस क्षेत्रमा पुगेका थिए ? भन्ने विषयमा ५ दिनभित्र रिपोर्ट बुझाउन समितिलाई म्यान्डेट दिइएकोमा आजदेखि समितिले काम थालेको हो । एसपी नेतृत्वको टोली डिएसपी चौधरी भेटिएको बुढीतोला क्षेत्रमा गएको छ ।
टोलीले बुढीतोलमा घटनाको बारेमा जानकारी संकलन गरेको प्रहरी स्रोतले बताएको छ । समितिले बुझाउने प्रतिवेदनका आधारमा चौधरीमाथि थप कारबाही हुनेछ । उनी मालाखेतीमा गएको दुई महिना मात्र भएको थियो ।
