कोरोना संक्रमणबाट मृत्यु भएका व्यक्तिको शव व्यवस्थापन सम्बन्धि कार्यबिधि संशोधन भए संगै नेपाली सेनाले मृतकका परिवारका उपस्थितिमा धार्मिक संस्कार अनुसार अन्त्येष्टि गर्न थालेको छ ।
बिगतमा नेपाली सेनाले कोरोनाको संक्रमणबाट मृत्यु भएकाहरुको शव गाड्ने गरेको थियो । शुरुवाती दिनमा परिवारको सदस्य दाहसंस्कारमा सहभागी समेत हुन पाउदैनथे ।
तर कार्यबिधि संशोधन भएसंगै मृतकका परिवारजनकै उपस्थितिमा शव जलाएर दाहसंस्कार गर्न दिईन थालिएको छ । सेती प्रादेशिक अस्पतालमा हिजो राति मृत्यु भएका कैलालीको गोदावरी नगरपालिका– ४ स्मृति टोलका ७३ वर्षीय शेरबहादुर महराको आज दिउसो गोदावरी नगरपालिका– २ स्थित गोदावरी आर्यघाटमा धार्मिक संस्कार अनुसार जलाएर अन्त्येष्टि गरिएको छ ।
मृतकका परिवारजनले नै शवमा मुखाग्नी दिएका थिए । नेपाली सेनाको भवानी दल गण तघेरीका सह सेनानी नवल सिंह रोकायाको नेतृत्वको टोलीले महराको अन्त्येष्टि गरेको हो । कोरोना संक्रमणबाट मृत्यु भएका व्यक्तिको जलाएर अन्त्येष्टि गरिएको यो दोस्रो घट्ना हो ।
