धनगढीमा भारतीय नागरिकलाई बंशजका आधारमा नेपाली नागरिकता दिलाउन सिफारिस दिएको आरोपमा पक्राउ परेका वडाध्यक्षलाई नागरिकता ऐन अनुसार कैद गर्न प्रहरीले राय दिएको छ । वडाध्यक्ष सहितका चारै जनामाथि अनुसन्धान गर्दै प्रहरीले उनीहरु सबैलाई नागरिकता ऐन अनुसार कारवाही गर्न सरकारी वकिलको कार्यालयलाई राय पठाएको हो ।
धनगढी उपमहानगरपालिका वडा नम्बर १२ का अध्यक्ष गणेशप्रसाद जोशी सहितका ४ जनामाथि अनुसन्धान गर्दै मिसिल सरकारी वकिलको कार्यालयलाई बुझाईएको जिल्ला प्रहरी कार्यालयका प्रवक्ता प्रहरी नायब उपरीक्षक प्रतीक विष्टले जानकारी दिए । वडाध्यक्षमाथि झुठो विवरणका आधारमा नागरिकता दिलाउन सिफारिस गरेको अभियोगमा नागरिकता ऐन २०६३ बमोजिम कारवाही गर्न राय सहितको मिसिल सरकारी वकिल कार्यालयमा बुझाईएको प्रवक्ता विष्टले बताए ।
नेपाली नागरिकता ऐन २०६३ मा विदेशीले नेपाली नागरिक भएको झुठो दावी गरी नागरिकता प्राप्त गरेमा १ वर्षदेखि ५ वर्ष सम्म कैद र ५० हजारदेखि १ लाखसम्म जरिवाना वा दुवै सजाय हुन सक्ने व्यवस्था रहेको छ । दण्ड सजाय सम्बन्धी ऐनको दफा २१ मा सो व्यवस्था छ । सो दफा बमोजिम सजाय भएमा प्राप्त गरेको नागरिकता स्वतः रद्द हुने उल्लेख गरिएको छ ।
सोही दफाको उपदफा २ मा कुनै विदेशीलाई झुठो विवरणका आधारमा नागरिकता दिलाउने कार्यमा सनाखत वा सिफारिस गर्ने व्यक्तीलाई ६ महिनादेखि ३ वर्षसम्म कैद वा २५ हजारदेखि ५० हजारसम्म जरिवाना वा दुवै सजाय हुने व्यवस्था गरिएको छ । यस्तै वडाध्यक्षसँगै पक्राउ परेका झुठो विवरण बनाई नेपाली नागरिकता लिने भारतीय नागरिक अलियास अन्सारी, नक्कली बुवा बनेका धनगढी १२ कै हिम्मतपुर शिविरका पुनिराम चौधरीका दाजु खुसिराम चौधरी र गीता चौधरीमाथि पनि अनुसन्धान सकेर सोही ऐन अनुसार कारवाही गर्न राय दिएको प्रहरीले जनाएको छ ।
नक्कली बुवा बनेका चौधरी भने फरार छन् । जिल्ला सरकारी वकिलको कार्यालयले प्रहरीले बुझाएको मिसिलमाथि अध्ययन भइरहेको जनाएको छ । प्रहरीको राय अनुसार अब सरकारी वकिल कार्यालयले उनीहरुमाथि कारवाहीको माग दावी सहित अदालतमा मुद्दा दर्ता गर्नेछ । २०७५ साल फागुन २० गते नक्कली बुवा बनेर भारतीय नागरिकलाई नागरिकताको सिफारिस दिएको भन्दै प्रहरीले कात्तिक ११ गते वडाध्यक्ष जोशीलाई पक्राउ गरेको थियो । टीकापुरमा बस्दै आएका भारतीय नागरिक अन्सारी सहितका ३ जनालाई पनि पक्राउ गरेर प्रहरीले अनुसन्धान गरेको थियो ।
