‘इनफ इज इनफ’ ले सुदूरपश्चिम प्रदेश सरकारसँग कोरोना भाईरस (कोभिड–१९) को रोकथाम तथा नियन्त्रणमा भएको खर्चको विवरण मागेको छ । प्रदेशको मुख्यमन्त्री तथा मन्त्री परिषदको कार्यालयमा सूचनाको हक प्रयोग गर्दै कोरोना महामारी नियन्त्रणमा प्रभावकारी काम गर्न सरकारलाई दबाब दिदै आएको ‘इनफ इज इनफ’ ले खर्च विवरण मागेको हो ।
कार्यालयमा सूचनाको हक सम्बन्धी ऐन २०६४ अनुसार लिखित निवेदन दर्ता गरी खर्च सम्बन्धीको सूचना माग गरिएको ‘इनफ इज इनफ’का अभियन्ता पुकार बमले जानकारी दिए । उनका अनुसार कोरोना भाइरसको रोकथाम तथा नियन्त्रणमा प्रदेश सरकारले गरेको खर्चको शिर्षक सहितको विवरण, मुख्यमन्त्री तथा मन्त्रीपरिषदको कार्यालयको खर्चको विवरण, प्रदेशमा क्वारेन्टिनको संख्या र अवस्था, प्रदेश सरकारले खरिद गरेको स्वास्थ्य सामाग्री तथा उपकरणको विवरण, प्रदेशमा सहेका कोरोना परिक्षण प्रयोगशाला र भेन्टिलेटरको संख्या र तिनको अवस्था सम्बन्धी सूचना माग गरिएको छ ।
यस्तै दैनिक कोरोना परीक्षणको दर, आरडीटी परीक्षण गरिएको संख्या, कन्ट्रयाक ट्रेसिङका लागि प्रदेश सरकारले परिचालन गरेको जनशक्ति र उनीहरुको पारिश्रमिक, भत्ता तथा सुविधाको विवरण र प्रदेशका मुख्यमन्त्री, मन्त्री, सचिव र सल्लाहकारहरुलाई दिइएको पारिश्रमिक, भत्ता तथा सुविधाको समेत विवरण माग पनि गरिएको छ । निवेदन दर्ता गर्नु पूर्व मुख्यमन्त्री तथा मन्त्री परिषदको कार्यालय अगाडी प्रदर्शन गरिएको थियो । ‘इनफ इज इनफ’ का युवाहरुले कोरोना परीक्षणको दर सुस्त भएको भन्दै प्रदेश सरकारको विरोध गरेका हुन ।
