सुदूरपश्चिम प्रदेशमा सुरक्षाको हिसाबले ३५२ मतदानस्थल अति संवेदनशील रहेका छन् ।भौगोलिक अवस्था, सुरक्षा चुनौती लगायतका दृष्टिकोणले सुरक्षा निकायले ३५२ मतदानस्थललाई अति संवेदनशीलको सूचीमा वर्गिकृत गरेको हो ।
प्रदेशभरि जम्मा एक हजार १६१ मतदान स्थल छन् । जसमध्ये ४०४ मतदान स्थललाई संवेदनशील सूचीमा राखिएको छ । ४०५ मतदानस्थल भने सामान्य रहेका छन् । ३२ वटा निर्वाचन क्षेत्र रहेको यो प्रदेशमा दुई हजार १४६ मतदान केन्द्र निर्धारण गरिएको छ । जसमध्ये, ७१० अति संवेदनशील, ७७८ संवेदनशील र ६५८ मतदान केन्द्र सामान्य रहेका प्रदेश प्रहरी कार्यालयले जानकारी दिएको छ ।
सामान्यभन्दा संवेदनशील मतदान स्थल र मतदान केन्द्रको सङ्ख्या बढी रहेको यो प्रदेशमा संवेदनशीलतानुसार निर्वाचनमा सुरक्षाकर्मी खटाइने जनाइएको छ । तर, सुरक्षाकर्मी के, कसरी र कति सङ्ख्यामा खटाइने, त्यो पछि मिलाइने प्रदेश प्रहरी कार्यालयका सूचना अधिकारी वरिष्ठ प्रहरी उपरीक्षक भोलाबहादुर रावलले जानकारी दिए ।
प्रदेश प्रहरी कार्यालयका अनुसार २३७ मतदान स्थल रहेको कैलालीमा ५३ मतदान स्थललाई अति संवेदनशील सूचीमा राखिएको छ । त्यस्तै, १३१ मतदान स्थल संवेदशनील र ५३ मतदान स्थल सामान्य रहेका छन् । यो जिल्लामा ६२९ मतदान केन्द्र कायम गरिएको छ । जसमध्ये, १५८ अति संवेदनशील, ३४४ संवेदनशील र १२७ मतदान केन्द्र सामान्य रहेका छन् । कैलाली प्रदेशमै सबैभन्दा बढी निर्वाचन क्षेत्र रहेको जिल्ला हो । यो जिल्लामा पाँच वटा निर्वाचन क्षेत्र कायम छ ।
यस्तै, तीन वटा निर्वाचन क्षेत्र रहेको कञ्चनपुरमा कायम भएको १३२ मतदानस्थलमध्ये ६६ वटा अति संवेदनशील, २६ वटा संवेदनशील र ४० वटा मतदानस्थल सामान्य रहेका प्रदेश प्रहरी कार्यालयले जानकारी दिएको छ । यो जिल्लामा ३४६ वटा मतदान केन्द्र रहेका छन् । जसमध्ये, १८५ अति संवेदनशील, ७३ संवेदनशील र ८८ वटा मतदान केन्द्र सामान्य रहेका छन् ।
भौगोलिक रुपमा विकट बाजुरामा ७० वटा मतदानस्थल कायम गरिएको छ । यो जिल्लामा सामान्य मतदान स्थल जम्मा चार वटामात्रै रहेका छन् । ४३ मतदान स्थल अति संवेदनशील र २३ मतदान स्थल संवेदनशील रहेका प्रदेश प्रहरी कार्यालयले जानकारी दिएको छ । बाजुरामा १२२ मतदान केन्द्र रहेका छन् । जसमध्ये, ७० मतदान केन्द्र अति संवेदनशील, ३५ संवेदनशील र सात मतदान केन्द्र सामान्य रहेका जनाइएको छ । स्थानीय तहको निर्वाचनमा विवाद भएपछि यो जिल्लाको बुढीगङ्गा नगरपालिकामा दोस्रो पटक मतदान भएको थियो ।
यस्तै, १०१ मतदान स्थल रहेको डडेल्धुरामा २३ मतदान स्थल अति संवेदनशील, ४१ वटा संवेशदनशी र ३७ वटा मतदा नस्थल सामान्य रहेका छन् । यो जिल्लामा १३९ मतदान केन्द्र कायम भएको छ । जसमध्ये, ३९ वटा मतदान स्थल अति संवेशदनशील, ५७ वटा संवेदनशील र ४३ वटा सामान्य रहेका छन् ।
बझाङमा १३५ मतदान स्थलमध्ये ५६ वटा अति संवेदनशील, ५८ संवेदनशील र २१ मतदान स्थल सामान्य रहेका छन् । भौगोलिक विकटतता रहेको यो जिल्लामा १८४ मतदान केन्द्र कायम गरिएको छ । जसमध्ये, ८३ मतदान केन्द्र अति संवेदनशील, ७५ वटा संवेदनशील र २६ मतदान केन्द्र सामान्य रहेका छन् ।
११५ मतदान स्थल रहेको डोटीमा नौ वटा अति संवेदनशील, ३० संवेदनशील र ७६ वटा मतदान स्थल सामान्य रहेका छन् । यो जिल्लामा १७७ मतदान केन्द्र कायम गरिएको छ । जसमध्ये, ११ वटा अति संवेदनशील, ४८ संवेदनशील र ११८ वटा मतदान केन्द्र सामान्य रहेका छन् ।
यसैगरी, अछाममा १३० मतदान स्थलमध्ये ६० वटा अति संवेदनशील, ५० वटा संवेदनशील र २० वटा मतदान स्थल सामान्य रहेका छन् । यो जिल्लामा २०८ वटा मतदान केन्द्र कायम गरिएको छ । जसमध्ये, ९७ वटा अति संवेदनशील, ८० वटा संवेदनशील र ३१ सामान्य रहेका छन् । भौगोलिक अवस्थानुसार विकट अछाममा पनि अति संवेदनशील र संवेदनशील मतदान स्थल र मतदान केन्द्रको सङ्ख्या बढी रहेको छ ।
बैतडीमा १२९ मतदान स्थल रहेको छ । जसमध्ये, ३१ वटा संवेदनशील, ३४ वटा संवेदनशील र ६४ वटा मतदान स्थल सामान्य रहेका छन् । त्यस्तै, २१० मतदान केन्द्रमध्ये ५४ वटा अति संवेदनशील, ५२ संवेदनशील र १०४ वटा मतदान केन्द्र सामान्य रहेका छन् ।
यसैगरी, ११२ मतदान स्थल रहेको दार्चुलामा ११ वटा अति संवेदनशील, ११ वटा संवेदनशील र ९० वटा मतदान स्थल सामान्य रहेका छन् । यो जिल्लामा १४१ मतदान केन्द्र कायम गरिएको छ । जसमध्ये, १३ वटा अति संवेदनशील, १४ वटा संवेदनशील र ११४ वटा मतदान केन्द्र सामान्य रहेको प्रदेश प्रहरी कार्यालयले जानकारी दिएको छ ।
