सुदुरपश्चिम प्रदेशका आर्थिक मामिला तथा योजना मन्त्री झपट वोहराले विवादित क्षेत्र भनेपछि संससद अवरुद्ध भएको छ । अर्थमन्त्री बोहराले संसदमा माफी माग्नुपर्ने अडान सहित दुई प्रतिपक्षी दलले संसद अवरुद्ध गराएका हुन् ।
प्रमुख प्रतिपक्ष दल नेपाली कांग्रेस र जनता समाजवादीको अवरोधका कारण सुदूरपश्चिम प्रदेश सभाको बुधबारको बैठक अवरुद्ध भएको हो । प्रदेश सभाको मंगलवारदेखि सुुरू भएको छैठौं अधिवेशनको पहिलो बैठकमा आर्थिक मामिला तथा योजना मन्त्री झपटबहादुर बोहराले प्रदेश सरकारको आर्थिक वर्ष २०७७÷२०७८ को विनियोजन विधेयक प्रस्तुत गर्ने क्रममा दार्चुलाको कालापानी, लिपुलेक र लिम्पियाधुरा क्षेत्रलाई विवादित क्षेत्र भनेर अभिव्यक्ती दिएको विषयलाई लिएर दुई प्रतिपक्ष दलले प्रदेश सभा बैठक अवरोध गरेका हुन ।
बुधबार बसेको प्रदेश सभा बैठक सुरु भए लगत्तै मन्त्रीले माफी माग्नुपर्ने माग सहित प्रतिपक्षी दलहरुले प्रदेश सभाको बैठक अवरोध गरेका हुन । संघीय सरकारले अद्यावधिक गरिसकेको र सम्पूर्ण राष्ट्र त्यसको समर्थनमा रहेका बेला अविभाज्य भू–भागलाई विवादित भनेकोमा अर्थमन्त्री बोहराले सदनमा माफी माग्नुपर्ने प्रतिपक्षी दलहरुको माग छ । प्रतिपक्षी दलको अवरोधपछि सभामुख अर्जुन बहादुर थापाले प्रदेश सभाको बैठक बिहीबरसम्मका लागि स्थगित गरेका छन ।
