धनगढी उपमहानगरपालिकाले तयार पारेको पाठ्यक्रम हो –‘हाम्रो धनगढी ।’ शैक्षिक सत्र २०८० देखि अनिवार्य लागु गर्ने गरि तयार भएको पाठयक्रमको पुस्तक विद्यालयहरुले पाउन सकेका छैनन् । ‘विद्यालयहरुमा शैक्षिक सत्र २०८० देखि लागु हुने गरी आधारभुत तह कक्षा १–८ को स्थानीय पाठ्यक्रम ‘हाम्रो धनगढी’ विद्यालयहरुले लागु गर्नु गराउनु हुन जानकारी गराइन्छ’ बैशाख ३ गते उपमहानगरपालिकाले जारी गरेको सूचनामा भनिएको छ ।
शिक्षक मोहन भण्डारीले भने –‘उपमहानगरपालिकाले अहिले पाठ्यक्रम दिएको छ । पुस्तक दिएको छैन् । शैक्षिक सत्र शुरु भएको दुई महिना भइसक्दा समेत पाठ्यक्रममार्फत विद्यार्थीहरुलाई अध्यापन गराउनुपर्ने अवस्था छ ।’ उनले विद्यालयले कहिले पुस्तक पाउने भन्ने टुङ्गो नरहेको बताए ।
स्थानीय पाठ्यक्रमका आधारमा यस शैक्षिक सत्र देखि धनगढी उपमहानगरपालिकाले प्रश्नपत्र तयार गर्ने छ । शिक्षा अधिकृत अकवर चन्दले भने –‘अहिले पाठ्यक्रम तयार भइ विद्यालयमा बुझाएका छौं । त्यसैका आधारमा शिक्षकहरुलाई तालिम पनि भइरहेको छ । पुस्तक छपाइका क्रममा रहेकाले अर्को शैक्षिक सत्रदेखि लागु गर्ने गरि काम हुने छ ।’
उपमहानगरले बनाएको पाठ्यक्रममा स्थानीय संस्कृती, जनजीवन, भुगोललगायतका पक्षलाई समेटेको छ । स्थानीय पाठ्यक्रम निर्माण गर्दा कक्षा १ देखि ८ सम्मका बालबालिकालाई आफ्नो क्षेत्रको प्राकृतिक, सामाजिक, सांस्कृतिक, ऐतिहासिक, तथा धार्मिक मठमन्दिरहरूबारे परिचित गराउने खालका विषय समावेश छन् ।
‘स्थानीय पाठ्यक्रममा भौगोलिक स्थिति, त्यहाँको वातावरण, वनस्पति, पशुपक्षी र तिनको संरक्षण ज्ञान र सीप दिने खालका विषयवस्तु समावेश गरिएको छ’ उनले भने –‘स्थानीय तहमा आइपर्ने आपत्विपत्को व्यवस्थापन र न्यूनीकरणमा जोड दिइन्छ ।’
‘विद्यार्थी जुन ठाउँमा हुर्केर बढेर अहिले पढ्दै छ, त्यस ठाउँबारे जान्नुप¥यो, त्यसको के महत्व छ थाहा दिनुप¥यो, अनि मात्र उसले आफ्नो ठाउँ चिन्छ । स्थानीय पाठ्यक्रम र पाठ्यपुस्तक निर्माण गर्ने कार्यमा स्थानीय शिक्षक नै सहभागी हुनु आवश्यक हुन्छ’ उनले भने । सो पाठ्यक्रम फागुन ३० गते बसेको कार्यपालिका बैठकबाट स्वीकृत भएको थियो । तर, उपमहानगरपालिकाले सो संग सम्बन्धित पुस्तक निर्माण नगर्दा धनगढीका विद्यालयहरु अन्यौलतामा रहेको गुनासो गरिरहेका छन् ।
