सीमापार विष्फोट हुँदा नेपालतर्फको बाटो अवरुद्ध गरे पनि भारतले तत्काल बाटो नखोल्ने देखिएको छ। पहिरोका कारण एक हप्तादेखि बाटो अवरुद्ध हुँदा पनि भारतले कुनै चासो दिएको छैन । भारतले धारचुला–लिपुलेक सडक निर्माणका क्रममा खसेको चट्टानले गत मंगलबारदेखि नदी थुनिएको छ भने नेपालतर्फको बाटो भत्किएको छ । दार्चुलाको व्यास गाउँपालिका–२ स्थित महाकाली किनारको घोडेटो बाटो भत्किएको हो ।
उक्त अवरोध हटाउन बिहीबार दार्चुलाका प्रमुख जिल्ला अधिकारी सिद्धराज जोशीले भारतको पिथौरागढस्थित धारचुलाका जिल्ला अधिकारी आनन्द स्वरूपलाई पत्र पठाएका थिए । तर सोमबार दिउँसोसम्म भारतीय प्रशासनबाट कुनै जवाफ नआएको प्रमुख जिल्ला अधिकारी जोशीले बताए ।
भारतले बाटो विस्तार गर्ने क्रममा पहिरो गएको र नेपालको बाटो अवरुद्ध भएकोले पहिरो हटाइदिन नेपालले पत्रमा आग्रह गरेको छ । तर अहिलेसम्म पनि भारतले पहिरो हटाएको छैन भने पत्रको पनि जवाफ दिएको छैन । जोशीका अनुसार दार्चुला प्रशासनले तत्कालका लागि वैकल्पिक बाटो निर्माण गरेको छ । गृह मन्त्रालयका प्रवक्ता जनकराज दाहालले यस विषयमा थप पहल गरिदिन भन्दै परराष्ट्र मन्त्रालयमा आइतबार पत्र पठाइसकेको जानकारी दिए ।
